اه الف ومليون
بقلمى / منصور ابو عبدالله
اه مره وعشره ومليون
اه من دمعه ساكنه العيون
اه من زمن صبح مجنون
اه الف ومليون
صرخه بتطلع من غير صوت
انا حى على الارض بصوره الموت
انا اللى كل ما اصحى الاقى نفسى بموت
اه الف ومليون
اه يا عزيز راح منى وسابنى
اه يا غالى غدر بيه وخانى
اه يا اقرب مالى لما باعنى
اه الف ومليون
اه من صرخه جواى و مكتومه
ومن ناس ظالمه وتقول مظلومه
والظلم كانه معادله ومنظومه
اه الف ومليون
اه لما ترسم طريق لنفسك
وتلاقى مليون حاجه تصدك
وتملى يوقف قدامك حظك
اه الف ومليون
اه لما ماتعرفشى مين الطيب
والضربه جيالك من غريب ولاقريب
اه يا ناس من زمن اغرب من العجيب
اه والف مليون
اه لما تنسى كل الاسيه
وتعامل الناس بطيبه وحنيه
يقولولك انت مش من الدنيا ديه
اه الف ومليون
اه لما تعمل الصح وتلاقى الصد
وتراجع نفسك متلقيش الرد
وتحب الناس وتقرب تلاقى البعد
اه الف ومليون
انا اسمى الحزن نفسه
وانا اللى دايما يجى على نفسه
ويحترم الناس وينسى شخصه
اه الف ومليون
انا اللى بكتب كتير عن الوجع
وانا اللى بصبر نفسى واقول جدع
وانا اللى من قلبه الفرح وقع
اه الف ومليون
اه من كلمه مكتوبه
على ورقه محبوسه
والف منها جواى مكتومه
اه الف ومليون
ليست هناك تعليقات:
إرسال تعليق