حتسامحينى ياما
بقلمى منصور أبو عبدالله ...
تعبتى وبان عليكى الكبر يا امى
تعبتى يا امى وزودت على همى
ضاقت الدنيا ياما فى وشى
تعبتى يا غاليه وتعبك فى قلبى
سامحينى امانه يا غاليه سامحى ابنك
سامحينى علشان انا مش جنبك
انتى عارفه انى عايش بحسك
والله يا امى اكتر ما بقول بحبك
بتقولى ياما فينك يا ولدى
ليه مش قاعد هنا جنبى
سيبنى اقول اه وحدى
يا خساره تربيتى وتعبى
حقك على امانه يا امى
والله مش بيدى بعدى
انا هنا فى غربتى
بس جنبك روحى وقلبى
مش انتى اللى قلتى سافر
متنفعشى تقعد هنا تكابر
ولازم تتغرب وتعافر
وتقول طيب وحاضر
مش قلتى عيالك بيكبروا اهم
ولازم ترعاهم وتشيل الهم
سافر وخلى عندك دم
واشقى علشان تسلم
مكنتيش عارفه انك بتكبرى كمان
وعاوزه منى رعايه وحنان
اديكى كبرتى وتعبتى كمان
وانا هنا واقف حيران
مال جذر الحنان وشاخ
وكل نفس فى بعدك باخ
وقلبى دقاته صراخ
والكلمه قبلها الف آآخ
امانه عليكى ياما تسامحينى
وروقى كده وكلمينى
برقدتك دى حتموتينى
دا قولة اه منك بتدبحينى
وعارفك ياما حتسامحينى
بقلمى منصور أبو عبدالله..
ليست هناك تعليقات:
إرسال تعليق