بقلمى منصور أبو عبدالله
اه يا بلد وصابها العمى
وكل معقول اترمى
ظلمك وصل حد السما
لا شوفنا فيكى راحه ولا هنا
نموت ومنحققش الامانى
الفرحه فيكى بنشوفها ثوانى
والدموع ايام وليالى
رخص فيكى كل غالى
فيكى ناس بتاكل من الزباله
وناس بتبات ايام جعانه
الظلم فيكى جبال راسيه
وبكل حملك على الغلابه دايسه
كل خيرك لغيرك بتديه
وولدك يوماتى تبهدليه
ناس فينا ساكنه قبور
ومربوطه فى ساقيه بتدور
وتنام تحلم يجى علها الدور
وكتير بيموت ميشوفشى النور
ناهب ارضها اللى اسمه مسؤول
ومين يسمع ومين يقدر يقول
بتختمى لينا ختم خروج
وتاكلنا غربه والم مأجوج
شوفى كام واحد بيتهان
ويتعامل كما الحيوان
وصابر ما هو اصله غلبان
ومش لاقى منك احسان
حسى بقى يا بلد بينا
ولخيرنا اللى ملكنا ورينا
متقطعيش بظلمك ايدينا
وبتعظيم سلام تؤمرينا
يا يتعدل حالك يا تدفنينا
محتاجين حضنك يدفينا
مش نشوف خيرنا بيتنهب قدام عنينا
ولما نصرخ بسجونك تخرسينا
احنا خير كتير بلاش تهدينا
بنحبك قوى بس انتى بتكرهينا
بقلمى منصور أبو عبدالله
ليست هناك تعليقات:
إرسال تعليق