بقلمى / منصور ابو عبدالله
ملعون يادى الشعر
ملعون يادى السهر
غلطان كل اللى صبر
من الظلم تعلمنا السكات
وخبينا جوانا الاهات
وكل ضحك القلب مات
انا طيب وعبيط وغلبان
انا طبع جار عليه الزمان
اطعن من القريب واقول كمان
انا اللى مش عاوز حاجه منها
ولا الدنيا دى ليه مكان فيها
لا عمرى عشمت ولا تحزمت بيها
عارفها دنيا وغداره
وعسلها بطعم المراره
ومتاكد انها دواره
اشرب المر فيها والحنظل
واتارينى عبيط واهبل
لا بتعلم وكل مالى بادبل
انا بكتب عن الحزن وانا مش دارى
وببنى بنى والدار مش دارى
حتى ضحكتى فيها طعم مرارى
انا الساكت وحافضل ساكت
ومش حاصرخ مهما ضاقت
يا ما ناس علشان تعيش ماتت
يا كل واحد بتفكرنى حزين
انا حزنى يكفى كل اللى عايشين
ويفضل منه كمان للميتين
ويلومنى الناس على حزنى
طب اعمل ايه مع حظى
مش عارف انا معانده ولا هو معاندنى
كل ما اجى اكتب ضحكه
تطلع غصب عنى دمعه
والحزن يسبق كل كلمه
على السطر بكتب الحلم
انى انسى الاسى والظلم
وكانى فرحى خطيه وجرم
الاه مش كلمه تتقال
ولا دمع على الخد سال
الاهه الم مبيفارقش البال
انا كل ليله قبل النوم ليه حكاوى
اكون على النسيان والنوم ناوى
الاقى الالم ان هربت يجينى في منامى
الوم على عيش وملح كان
ولا صحاب مليش بينهم مكان
ولا غريب طلع خسيس وجبان
انا اللى بادى عشره وحب
الاقى خيانه تضرب ضرب
وفى حزنى انا لا ينفع دواء ولا طب
ملعون يادى الشعر
ملعون يادى السهر
ليست هناك تعليقات:
إرسال تعليق