حصالة وجع
بقلمى منصور أبو عبدالله
ليه الوجع مستقصدنى
وكل يوم ابات على هم يوجعنى
اصرخ بعلو الصوت ولا حد سامعنى
انا بقيت حصالة وجع
مع انى طيب وجدع
ولا يوم ملكنى الطمع
ياه على قلبى وبكاه
تعبت انا من قولة اه
شايف جرحى ومش عارف دواه
راضى بقسمتى وبنصيبى
طب يمكن طيبتى هى عيبى
والزمن بيحلاله تعذيبى
جواى صراخ من غير صوت
عايش بس حاسس بالموت
عمرى بيعدى منى ويفوت
عمرى ما بحكى ولا أشكى
وبحط همى كله فى شعرى
ومسلم لله مصيرى وامرى
بس ليه الوجع عاملنى تسليته
وواخد قلبى مسكنه وبيته
ومش عارف يوم اسيبه
الوجع كأنه بحر انا فيه غرقان
والزمن جاى عليه كمان
انا ما بقتش حاسس انى انسان
انا حصالة وجع مبتتملاش
واجى افرح الوجع يقول بلاش
اللى زيك ما يستهلهاش
ايه ذنبى اللى عملته
حتى حقى من الفرح ما اخدته
طب هاتولى حد اكون ظلمته
مين يجاوب قلبى عن سؤاله
ويقوله ايه اللى بيجراله
وليه الوجع مش سايبه فى حاله
عمرى حقى ما يوم اخدته
ولا جيت على زمانى عاتبته
بس ليه الوجع عاملنى حصالته
بقلمى /منصور أبو عبدالله
ليست هناك تعليقات:
إرسال تعليق