بقلمى منصور أبو عبدالله
متعشمشى فى حد ولو حتعيش راهب
ومش كل اللى يقابلك تعمله صاحب
على كتر الناس اختلفت المذاهب
والله حتى لو كنت ملاك مانت عاجب
اسمع منى كلام زين واوعاه
كتر العشم يجيب المصايب
واللى ما يختشى من ربه اخشاه
واوعاك من لدغة القرايب
داللى يقول كلام لازم يدرسه ويوعاه
واوعاك تفهم اللى غباه علاه
وكل الناس ما تيجى على هواه
الادب فى الرجال اصل وجاه
خليك جدر فى الارض مداد
وكون فى الفعل دوم سداد
وان غلبك فى يوم الردى
انصب عزاك ومتعملشى حداد
طاحونة القرابب يا كتر غلتها
تميل على بعضها وعيلتها
لا تعرف دقيقها من ردتها
وكل يوم تزيد جرحها وعلتها
فمتعشمشى فى اللى يصاحبك فى وشك
وان مال عليك زمانك يوم يرميك
وبضحك سنته قدامك يغشك
ودايما يخلف فيه ظنونك وعشمك
وامسك زين فى اللى يرد غيبتك
ويحفظ جواه مكانك وقيمتك
وياما قالوها زمان اللى قبلك
رب اخ لم تلده لك امك
واعشم فى ود الاصول تلقاه
ومتصاحبشى اللى يصاحبك على هواه
واللى ينساك فى يوم حاسبه وانساه
واوعاك من اللى الجوع منشأئه ومرباه
كلام الدنيا كتير قوى وتقيل
وياما ناس قالت فيه مواويل
كلام يرمى وراه جرح وقتيل
وكلام من طيبه يداوى الف عليل
ويا حسرة اللى يقول قوله متسمعشى
زيه زى اللى زرع زرع ومطرحشى
وزى اللى كل عيش وملح ومتمرشى
انا قلت اللى عندى وفى طريقى حمشى
بقلمى منصور أبو عبدالله
ليست هناك تعليقات:
إرسال تعليق